శ్రీవిద్యా ప్రస్థానం-28

శ్రీవిద్యా ప్రస్థానం

(సాధనా సిద్ధికి ఓ సామాన్యుడి ఆధ్యాత్మికాప్రయాణం)

- శ్రీభువనానంధనాథులు

28

ఈ విధంగా ఒక సంవత్సరం గడచింది. అంతా మామూలగానే జరగసాగింది. చంచల్ సాధన, ప్రేమతో స్నేహం యధావిధిగానే సాగాయి. అతడు గురువుగారిని అప్పుడప్పుడు కలుసుకోవడం జరుగుతుండేది. కాని అతను కొత్త విషయాలేమీ నేర్చుకోలేకపోయాడు.

అమ్మ తన బిడ్డలను ఎన్నటికి వదలదని మనకు తెలుసు కదా!. ఆమె సరియైన సమయంలో సరియైన విధంగా మనకు అవకాశాలను ఇస్తూ ఉంటుంది. చంచల్కు కూడా తనకు తాను తెలుసుకోవడానికి/సరిదిద్దుకోవడానికి అలాంటి అవకాశం ఒకటి వచ్చింది.

మనమేమిటో మనకు మాత్రమే తెలుసు. ఎవరికి వారు తమకు తాము ఎప్పటికప్పుడు తమ చేతలను సరిచూసుకొంటూ జీవనాన్ని సాగించాలి. మనం చేసుకొనే తప్పొప్పులను తెలుసుకుంటూ వాటిని సరిచూసుకుంటూ మనకు మనమే సంస్కరించుకోవాలి. ప్రతీఒక్కరికీ ఈ అవకాశం ఉంటుంది. ఆ అవకాశాన్ని మనం సద్వినియోగపరచుకోవడమే ముఖ్యం. అలాంటి అవకాశమే చంచల్కు తన కూతురు మోహ ద్వారా ఒకసారి కలిగింది.

మోహః మనం ఏదైనా ఊరు వెడదాం నాన్న. చాలా రోజులైంది మనం బయటి ఊరికి వెళ్ళి.

చంచల్ః అవునుకదా! చాలా రోజులక్రితం మనం డార్జిలింగ్ వెళ్ళాం. సరే, ఈసారి ఎక్కడకు వెళ్దామో చెప్పు.

మోహః ఈసారి మనం సిమ్లా వెళ్దాం. నేను అక్కడ ఐస్ లో ఆడుకుంటాను.

చంచల్ః సిమ్లా చాలా మంచి ఎంపిక. కానీ మనం అక్కడకు వెళ్ళి రావాలంటే కనీసం పది రోజులైనా పడుతుంది. మనకు అన్ని సెలవులు లేవు కాబట్టి ఇంకెక్కడికైనా మనకు దగ్గరగా ఉన్న ప్లేస్ కు వెళ్దాం.

ఆకర్షః ఐతే మనం ఊటీ వెల్దాం. అది మనకు దగ్గరేకదా.

చంచల్ః ఇది కూడా మంచి ఐడియా. సరే అక్కడికే వెల్దాం. ఒకసారి బ్యాంక్లో డబ్బులు ఎన్ని ఉన్నాయో చూసుకొని టిక్కెట్స్ బుక్ చేసుకుందాం. మనకు కనీసం ముప్పైవేలైనా కావాలి కదా.

ఆకర్షః ముప్పైవేలా? చాలా ఎక్కువ కదా. పోనీ తక్కువలో అయ్యేదేదో మీరే చూద్దురు. ఎప్పుడూ విహార ప్రాంతాలేనా. ఈసారి ఏదైనా పుణ్యక్షేత్రానికి వెళ్దాం.

చంచల్ః అవును నువ్వు చెప్పింది బాగానే ఉంది. ఏదో చల్లని వాతావరణానికి అంత ఖర్చు పెట్టే బదులు మనం పుణ్యక్షేత్రానికి వెడితే మంచిదేమో. ఊటీ వెళ్ళితే మన డబ్బులు ఖర్చవ్వగా ఆ సరదా రెండు రోజుల తర్వాత మర్చిపోతాం. అదే పుణ్యక్షేత్రమయితే ఆ పుణ్యం ఫలం మన జీవితాంతం మన వెంటే ఉంటుంది.

ఆకర్షకు అతడు కొంచెం కొత్తగా కనిపించాడు. మీరు చెప్పింది చాలా కరెక్ట్. ఎక్కడకు వెళ్ళాలో మీరే చెప్పండి.

చంచల్ః నీకు చల్లని వాతావరణం, మోహకు ఆడుకోవడానికి చక్కని స్థలం, నాకు మనసు ప్రశాంతత ఇవ్వన్నీ కలగలసి దొరికే స్థలం శ్రీశైలం. శ్రీశైలం ద్వాదశజ్యోతిర్లింగాలలో ఒకటి ఇంకా అష్టాదశ శక్తిపీఠాలలో ఒకటి. అమ్మవారు, అయ్యవారు భ్రమరాంబిక, మల్లికార్జునస్వామి రూపాల్లో మనకు దర్శనమిస్తారు. మనకు కావలసినది దొరకుతుంది మన పెట్టే ఖర్చుకు న్యాయం జరుగుతుంది. ఏమంటారు?

అతడు చెప్పినదానికి ఆకర్ష, మోహ వెంటనే ఒప్పుకున్నారు. ఆకర్షకు కొన్ని రోజులు ఎటైనా వెళ్ళి రావాలని ఉంది. ఆమెకు రోజువారి ఇంటి పనులతో విసుగ్గా ఉంది. అమెకు కొంచెం విశ్రాంతి తీసుకోవాలని ఉంది. స్త్రీలకు అది అప్పుడప్పుడు అవసరం కూడా. ఆమెకు మనసులో ఊటీకు వెళ్ళలేకపోతున్నందున కొంచెం బాధగా ఉన్నా ఆమే సంతోషంతోనే చంచల్ చెప్పినదానికి ఊఁ కొట్టింది.

చంచల్ ప్రేమకు తమ ప్రయాణసంగతి తెలిపి తర్వాత మూడు రోజులదాక ఎటువంటి మెసేజ్ లు చేయవద్దని చెప్పాడు. తర్వాత అతడు గురువుగారి దగ్గరకు వెళ్ళి తమ శ్రీశైల ప్రయాణం గురించి చెప్పాడు. గురువుగారు చాలా సంతోషించి అతడు అక్కడ ఏమేమి చేయాలో చెప్పారు. చంచల్ గురువుగారి దగ్గర సెలవు తీసుకొని బయటకు వెల్తున్న సమయంలో గురువుగారు అతని వంక కొన్ని క్షణాలు దీక్షగా చూసి చిన్నగా నవ్వారు. ఈ విషయం చంచల్కు తెలియదు. కానీ గురువుగారికి అక్కడేమి జరుగుతుందో తెలుసు.

చంచల్ ఎప్పుడూ పుణ్యక్షేత్ర దర్శనాలగురించి ఆలోచించలేదు. అతడికి తన డబ్బుని, సమయాన్ని పబ్బుల్లోని, క్లబ్బుల్లోని వెచ్చించడమే తెలుసు. కానీ ఇప్పుడు జరుగుతున్నదేమిటి? అతనిలోని ఈ మార్పుకు కారణం ఏమిటి? ఇదే ఇక్కడ మనం గమనించవలసిన ముఖ్యవిషయం.

తనను శ్రీశైలానికి తీసుకువెడుతున్న అంతర్లీనశక్తిని అతడు గుర్తించే స్థాయిలో లేడు. అది శ్రీశైలమే అవనవసరం లేదు. అది మరేదైన దేవాలయంగాని, సిద్ధపురుషుల సాంగత్యంగాని అవ్వచ్చు. వంద కిలోమీటర్ల ప్రయాణమైనా ఒక్క అడుగుతోనే ప్రారంభమవుతుంది కదా.

ఆమర్నాడు వారు శ్రీశైలానికి చేరుకున్నారు. రూం వెదుకులాట, ప్రయాణ అలసట అన్నీ తీరిన తర్వాత వారు దర్శనానికి బయలుదేరారు. అప్పుడు సాయం సమయం ఆరు కావస్తోంది. సూర్యాస్తమయం ఎంతో ఆహ్లాదకరంగా ఉంది. మేఘాలు కొంచెం ఎరుపు రంగులో చాలా అందంగా కనబడుతున్నాయి. ఎక్కడనుండో ఘంటారావం వారికి లయబద్దంగా వినిపిస్తోంది. చంచల్ మనసు ఎంతో ప్రశాంతంగా ఉంది ఆసమయంలో. ఆలయప్రధాన ద్వారం ద్వారా వారు దేవాలయంలోకి అడుగుపెట్టారు.


(ఇంకావుంది..........)

శ్రీవిద్యా ప్రస్థానం-27

శ్రీవిద్యా ప్రస్థానం

(సాధనా సిద్ధికి ఓ సామాన్యుడి ఆధ్యాత్మికాప్రయాణం)

- శ్రీభువనానంధనాథులు

27

గురువుగారుః సశాస్త్రీయపద్ధతిలో మంత్రసాధన చేస్తే సిద్ధులు కలుగుతాయి. కుండలిని కూడా చైతన్యవంతం అవుతుంది. మూలాధారచక్రంలో మంత్రసాధన చేస్తే భూత, భవిష్యత్, వర్తమానాలకు సంబంధించిన జ్ఞానం వస్తుంది. ఈ విధంగానే వివిధచక్రాలలో మంత్రోపాసన కొన్ని రకాల సిద్ధులను ఇస్తాయి.

తర్వాత గురువుగారు మూలాధారంలో మంత్రోపాసన ఎలా చెయ్యాలో అతనికి వివరించారు.

పూర్ణ తన కృతజ్ఞతలు గురువుగారికి తెలిపి ఈ విధంగా అడిగాడు....

పూర్ణః సిద్ధులు కలగడం కుండలిని చైతన్యవంతమైనదనడానికి నిదర్శనమా?

గురువుగారుః అలా అనుకోవడానికి వీలులేదు. కొన్ని సందర్భాలలో కుండలిని జాగృతమైనా సిద్ధులు కలగకపోవచ్చు. చాలా సందర్భాలలో కుండలిని జాగృతమైనప్పుడు సిద్ధుల కలుగుతాయి. ఎందుకంటే అవి సాధకుని మాయలో పడవేయాలి కదా. ఏ సాధకుడైతే వాటి మాయలో పడకుండా జాగ్రత్తగా ఉంటాడో ఆ సాధకుడే యోగిలా మారుతాడు.

పూర్ణః గురువుగారు, ఈ మధ్య ఇంటెర్ నెట్లో నేనొక సాధకుని అనుభవాన్ని చదివాను. అతడు అమెరికాలోని అలస్కా ప్రాంతంవాడు. అతనికి మన దేశంలో గుజరాత్ రాష్ట్రంలో ఉన్న ఒక గురువుగారు మహాషోడశీ మంత్రాన్ని టెలిఫోన్ ద్వారా ఉపదేశం ఇచ్చారట. తద్వారా అతడు మూడునెలలుగా ఆ మంత్రోపాసన చేయసాగాడట. అలా మూడు నెలలు గడిచిన తర్వాత ఒక రోజు అతనికి అతని నుదుటియందు (ఆజ్ఞాచక్రం) ఒక పెద్ద వెలుగు కనిపించిందట. ఆ దర్శనం అయిన తర్వాత అతనికి కొత్త ఉత్సాహం పుంజుకొచ్చినట్టయిందట. ఆ వెలుగే శ్రీమాత అని తనకి దైవదర్శనం అయ్యిందని అతను అనుకున్నాడట. ఎందుకంటే శ్రీమాత జ్యోతి స్వరూపం అని అతనికి వారి గురువుగారు చెప్పారట. ఆ దర్శనం అయిన దగ్గర నుండి అతను ఒకచోట ఉండలేకపోవడం, ఎవరో తనను అనుసరిస్తున్నట్టుగా ఉండటం, ఆ వెలుగు ఎప్పుడూ అతని వెంటే ఉన్నట్టుగా అనిపించడం ఇలా ఎన్నో రకాల అనుభూతులు, అనుభవాలు కలుగసాగాయట. చివరగా తనకు తన ఆత్మస్వరూప దర్శనం అయ్యిందని, అహంబ్రహ్మాస్మి స్థితికి చేరుకున్నానని అతను ప్రకటించుకున్నాడు.

ఆత్మస్వరూపనిరూపణం అంత సులువా గురువుగారూ?

గురువుగారుః ఎందుకు కాదు నీకటువంటి గురువుండి అంత తీవ్రమైన సాధన చేస్తే...

పూర్ణకి గురువుగారి మాటల్లో వ్యంగ్యం కనిపించింది.

పూర్ణః నేనేమైన తప్పుగా మాట్లాడితే క్షమించండి. నా ఉద్దేశ్యం శాస్త్రాన్ని తెలుసుకోవాలనే.

గురువుగారుః ఏమి చెప్పమంటావు పూర్ణ. ప్రస్తుత రోజులు అలా ఉన్నాయి మరి. ఆధునిక గురువులు – ఆధునిక శాస్త్రాలు, ఆధునిక శిష్యులు – తక్షణ ఫలితాలు. ఆజ్ఞాచక్రంలో వెలుగు ఆత్మానుభవము కాదు. ఎవరైనా ఒక మూడు గంటలపాటు కదలకుండా కళ్ళు మూసుకొని కూర్చుంటే వెలుగులాంటిది కనిపిస్తుంది. అంతమాత్రాన్న ఆత్మానుభవమైనట్టుకాదు. స్వరూపనిరూపణమును ఆత్మానుభవముగా చెప్పవచ్చు. ఈ స్వరూపనిరూపణము మూలాధార స్థిత అమ్మవారు సహస్రార స్థిత అయ్యవారిని చేరుకున్నప్పుడు అవుతుంది. పునాదులు లేకుండా ఎవరైనా భవంతిని నిర్మించగలరా? అలాగే కుండలిని మూలాధారాది చక్రాలను వదలి తిన్నగా ఆజ్ఞాచక్రాన్ని చేరడం సాధ్యమవుతుందా? లోకులు ఈ చిన్న తర్కాన్ని ఎందుకు అర్ధంచేసుకోలేరో తెలీదు. నేను నీకిచ్చే సలహా ఒక్కటే. ఇలాంటి పిచ్చి వ్యాసాలు చదవడంమాని ఆ సమయాన్ని నీ సాధనకు వినియోగించుకో. అది నీకెంతో ఉపయోగపడుతుంది.

***

ప్రేమ సంక్షిప్త సమాచారం (SMS)చూడగానే చంచల్కు చాలా ఆనందం వేసింది. అదే సమయంలో ఆకర్ష వంట ఇంట్లో ఉన్నట్టు గుర్తించి, “హాయ్, నేను ఇంట్లో ఉన్నాను. రేపు నీతో మాట్లాడుతాను ...”  అని ప్రేమకు జవాబిచ్చి, తన చరవాణిలో ఆమె పేరును ప్రేమ్ కుమార్ గా మార్చి ఆ మెసేజ్ ను తొలగించాడు.

ఆ రోజు రాత్రి ఆకర్ష అతనిని అడిగింది....

ఆకర్షః ఏమిటి విషయం. అయ్యగారు ఇవాళ తెగ రెచ్చిపోయారు.

చంచల్ః నీవల్లే డియర్. నిన్ను ఆ భంగిమలో చూసేసరికి నేను తట్టుకోలేకపోయాను. నీ అందం నన్నెప్పుడూ పిచ్చివాడిని చేస్తుంది అంటూ ఆమెను తన చేతుల్లోకి తీసుకున్నాడు. ఆమె ఎంతో ఆనందంగా అతని కౌగిలిలోచేరి అతని విశాలమైన వక్షస్థలం మీద వాలింది. ఆ సమయంలో అతడు ఆమె స్థానంలో ప్రేమను ఊహించుకున్నాడు.

మర్నాడు అతడు ఆఫీసుకు వెడుతూ కౌళం గురించి మళ్ళీ ఆలోచించడం మొదలుపెట్టాడు. “నేనెందుకు ఆ విధంగానే ఆలోచించాలి? నా ఆలోచనా విధానం తప్పేమో. ఆ పూజా విధానాల వెనుక ఏదో తెలియని నాకర్ధంకాని రహస్యాలు ఉండి ఉండవచ్చు. పూర్తి విషయం తెలియకుండా నేనలా ఆలోచించడం తప్పుకదా. ఆ లోతైన రహస్యాలు తెలుసుకోవడం ఎలా? గురువుగారిని అడిగితే? అలా అడిగితే గురువుగారు నా గురించి ఏమైనా తప్పుగా అనుకుంటారేమో. నేను కౌళానికి ఆకర్షితుడని అవుతున్నానని అనుకుంటారేమో. అది నాకు నచ్చదు. మరి ఎలా?

అతను ఈ విధంగా ఆలోచిస్తుండగా అతనికి అతని బుర్రలో తళుక్కున ఒక ఉపాయం తట్టింది. అవును అదే ఉత్తమం. గుగూల్లో వెదకి నేను అసలు విషయాన్ని తెలుసుకుంటాను అని అతను ఒక నిర్ణయానికి వచ్చాడు.

ఆఫీసుకు చేరిన వెంటనే అతడు అంతర్జాలంలో కౌళాచారమని గుగూల్లో వెదికాడు. అందులో అతడికి చాలా వెబ్ సైట్స్ కనిపించాయి. అసలు అన్ని వెబ్ సైట్స్ ఉంటాయని అతడు ఊహించలేకపోయాడు. కౌళం అంత రహస్యమైతే ఇంత బాహాటంగా ఈ సమాచారాన్ని ఎందుకుంచారు? అతడికి కొంచెం ఆశ్చర్యమేసింది. ఆ సైట్స్ లో అతడికి బొమ్మలు, రాతప్రతులు, వీడియోలు, ఆడియోలు ఇలా చాలా రూపాల్లో సమాచారం కనిపించింది. అతడిక ఎంతమాత్రం తన కుతూహలాన్ని ఆపొకోలేక కొన్ని రాతప్రతులను చదవడం ప్రారంభించాడు. నిజమైన కౌళ సమాచారం ఏమిటో అతడికి తెలియదు. ఆ సైట్స్ లో ఉన్నవన్నీ నిజాలేనని అతడు అనుకోసాగాడు. ఆక్రమంలో అతడు కొన్ని ఫోటోలు, వీడియోలు చూడసాగాడు. చాలా వాటిలో యోని పూజగురించి వివరించడం జరిగింది. అతడు కొన్ని నగ్నఫొటోలు కూడా చూడ్డం జరిగింది. వాటిని మరింత శోధించగా అతడికి కొన్ని పోర్న్ సైట్స్ దర్శనమిచ్చాయి. అతడు కొంత తత్తరపడి వెంటనే వాటిని మూసివేసాడు. కొంచెంసేపటి తర్వాత వీటిని చూస్తే తప్పేముంది. అది జీవితంలో ఒక భాగమేకదా అని తనకు తాను సమాధానపడి తిరిగి వాటిని చూడసాగాడు.

కొంచెంసేపటి తర్వాత అతడికి ప్రేమనుండి SMS వచ్చింది...

ప్రేమః హలో....

చంచల్ః హాయ్ ... ఎలా ఉన్నావు?

ప్రేమః ఎక్కడ ఉన్నావు?

చంచల్ః ఆఫీస్

ప్రేమః నేను ఫోన్ చెయ్యనా?

చంచల్ః తప్పకుండా. నీ గురించే ఎదురుచూస్తున్నాను.

అక్కడ నుండి వారి సంబంధం కొత్తపుంతలు తొక్కింది. కాని వారికెప్పుడూ వ్యక్తిగతంగా కలుసుకోవడానికి అవకాశం రాలేదు. చదువరులు వారి సంబంధం ఎలా సాగిఉంటుందో ఊహించుకోగలరు. వారి ప్రేమకధను ఇక్కడ చర్చించ అవసరం లేదు. ఒక్కటి మాత్రం నిజం. చంచల్ మాయలో పడ్డాడు. అతడు ఆ మాయనుండి బయటపడ్డాడా లేదా? గురువుగారు, శ్రీమాత అతనిని ఎలా రక్షించారు? అనేది ముందుముందు చూద్దాం.


(ఇంకావుంది..........)

 

శ్రీవిద్యా ప్రస్థానం-26

శ్రీవిద్యా ప్రస్థానం

(సాధనా సిద్ధికి ఓ సామాన్యుడి ఆధ్యాత్మికాప్రయాణం)

- శ్రీభువనానంధనాథులు

26

ఒక గంట తర్వాత ఆకర్ష అనుకుంది “ఏమైంది ఇవాళ ఇతనికి. ఇంతలా రెచ్చిపోయారు. కాని, నాకు చాలా బాగుంది. అంతసేపు ఏదో లోకంలో విహరించాను. ఇంతకు ముందు ఇలాంటి అద్భుతమైన అనుభవం కలుగలేదు.”

ఆమె చంచల్ని ఏమిటి విషయం అని అడుగుదామనుకుంది. అతని వైపు చూస్తే అతను అలసట తీర్చుకుంటూ కనిపించాడు. ఆ సమయంలో ఆమెకి అతను కొంచెం అసాధారణంగా కనిపించాడు. ఆమెకు అతని విశ్రాంతిని భగ్నం కలుగజేయాలని అనిపించలేదు. ఆమె మౌనంగా అక్కడనుండి వెళ్ళిపోయింది.

కొంచెంసేపటి తర్వాత చంచల్ స్నానం చేస్తూ ఇలా ఆలోచించసాగాడు. “ఏమైందివాళ్ళ నాకు? నేనెందుకిలా ప్రవర్తించాను? కౌళ పాఠాలు వినడం వలనా? గురువుగారు నాకు ప్రాథమిక అంశాలు మాత్రమే కదా? ప్రాథమిక అంశాలకే ఈ విధంగా ఉంటే లోతైన వషయం ఇంకెలా ఉంటుందో కదా? అసలు అలాంటి పూజావిధానాలు కూడా ఉంటాయా? చాలా ఆశ్చర్యకరంగా ఉన్నా దీనిని నమ్మక తప్పడంలేదు. ఒకవేళ కౌళమే ఒప్పు అయితే అన్యస్త్రీసంపర్కం తప్పుకాదు కదా? ఏమో నేను ఆ సిద్ధాంతాలను తప్పుగా అర్ధం చేసుకుంటున్నానేమో”.

ఇలా ఆలోచనలతో అతను స్నానం ముగించి, మంత్రజపం ప్రారంభించాడు. ఆశ్చర్యంగా అతడు రోజూకంటే ఆరోజు కొంచెం ఎక్కువ ఏకాగ్రతతో జపం చేయగలిగాడు. జపం అయిన తర్వాత “ఈరోజు జపం చాలా బాగా జరిగింది. ఇవ్వాళ్ళ నాఏకాగ్రత పెద్దగా చెదరలేదు. నేటి అనుభవాల దృష్ట్యా ఈరోజు జపం సరిగ్గా చేయలేనేమోనని అనిపించింది. కాని రోజూ కన్నా బాగా జరిగింది. అంటే ఈ లోకంలో తప్పు, ఒప్పు అన్నది లేదన్న మాట. కనుక నేను జీవితాన్ని మరింతగా ఎందుకు ఆనందంగా అనుభవించకూడదు? ఆ సమయంలో అతని మదిలో ప్రేమ మెదిలింది. ఎంత అందమైనది ఆమె. మా కాలేజ్ రోజులకన్నా ఆమె సొగసు, అందం మరింతగా పెరిగింది. ఆమె మొగుడు భలే అదృష్టవంతుడు. అంత అందమైన భార్యను పొందగలిగాడు. అతడికి మా సంగతి తెలీదు. పాపం అమయక పక్షి. చంచల్కు ఆ సమయంలో తన భార్య ఆకర్ష గుర్తుకు రాలేదు. ఇంతలో అతనికి అతని చరవాణిలో సంక్షిప్త సందేశం వచ్చింది. చూస్తే అది ప్రేమ నుండి “హాయ్” అని....

***

అదే సమయంలో పూర్ణ గురువుగారిని అడుగుతున్నాడు...

పూర్ణః గురువుగారు, చంచల్ ఇప్పుడిప్పుడే శ్రీవిద్యా సాధన ప్రారంభించాడు. ఈ ప్రారంభదశలోనే కౌళమును పరిచయం చేయడంవలన అతడు ఆ సిద్ధాంతాలను తప్పుగా అర్ధం చేసుకోవడానికి చాలా అవకాశం ఉంది కదా. నా అభిప్రాయం చెప్పినందుకు నన్ను క్షమించండి.

గురువుగారుః సాధారణ సాధకుల విషయంలో నువ్వు చెప్పింది అక్షర సత్యమే పూర్ణ. కానీ, చంచల్ సంగతి వేరు. అతడొక భ్రష్టుపట్టిన సాధకుడు. తన క్రిందటి జన్మలో అతడు శ్రీవిద్యోపాసన చేసాడు. కాని ఉధృతమైన కామ మరియు ఇతర లోభాలవలన అతడు భ్రష్టుపట్టాడు. క్రిందటి జన్మలో అతని ఉపాసన వలన అతడు మళ్ళీ ఈ జన్మలో ఉపాసన ప్రారంభించగలిగాడు. అతడి పూర్వజన్మల కర్మలను అతడు ఎంత త్వరగా క్షయపరచుకుంటే అంత మంచిది. అందుకై మనం అతడికి తోడ్పడాలి. అతని కర్మ క్షయమవనంతవరకు అతడు ఆధ్యాత్మికంగా ఎదగలేడు. అతనికి అసలైన పరీక్షాకాలం ఇప్పుడు మొదలైంది. అతడు ఈ పరీక్షలో విజయుడైతే ఈ జన్మలో అతడు ఆధ్యాత్మికంగా చాలా దూరం ప్రయాణించగలడు. కానీ అతనికి ఆత్మానుభూతి, మోక్షం కలగాలంటే అతను మరియొక జన్మ ఎత్తితీరవలసిందే. ఒకవేళ అతడు ఈ పరీక్షలో ఉత్తీర్ణుడు కాలేకపోతే అతనికి మరో ఏడు జన్మలదాక మోక్షం ఉండదు. నా ఊహ నిజమైతే అతడు ఇప్పటికే అసహజ మరియు అధర్మ శృంగారానికై ఆలోచిస్తూ ఉంటాడు. జీవులకు కామ, క్రోధ, లోభ, మోహ, మద, మాత్సర్యాలు నిజమైన శత్రువులు. వీటిబారిన పడకుండా తప్పించుకోవడం చాలా కష్టం. తప్పించుకున్నవారు యోగులవుతారు. లేనివారు భోగులవుతారు. జీవులలో ఈ అరిషడ్వర్గాలు ఒకొక్కరికి ఒకొక్క స్థాయిలో ఉంటాయి. వీటిలో కామం చాలా ప్రమాదకరమైనది. చంచల్ లో ఈ కామశత్రువు మిగతా వాటికన్నా కొంచెం ఎక్కువ స్థాయిలో ఉంది. చూద్దాం... అమ్మ అతని భవిష్యత్తును ఏవిధంగా నిర్ణయించిందో.

పూర్ణః గురువుగారు, మీరు జీవుల పూర్వ జన్మలు, రాబోవు జన్మలు తెలుసుకోగలరు. మరి నేనెందుకు తెలుకోలేకపోతున్నాను?

గురువుగారుః ఒకరి జన్మ రహస్యాలు తెలుసుకోవడం పెద్ద గొప్ప విషయం ఏమీ కాదు. ఒకరి జాతకచక్రం ద్వారాగాని లేదా మంత్రసాధన ద్వారాగాని అది తెలుసుకోవచ్చు. మంత్రోపాసన ద్వారా అది తెలుసుకోగలిగితే దానిని సిద్ధి అని అంటారు. ఈ సిద్ధులు ఆధ్యాత్మిక ఎదుగుదలకు అవరోధాలు. అవి సాధకుడిని మాయలో పడవేస్తాయి. తద్వారా వారు భ్రష్టుపట్టిపోవడానికి అవకాశం ఉంటుంది. అందుకే శ్రీరామకృష్ణులవారు సిద్ధులు అశుద్ధాలని అనేవారు. కనుక నిజమైన సాధకులు సిద్ధులగురించి ప్రాకులాడకూడదు. ఏ సాధకుడికైనా ఈ సిద్ధులు కలిగినా అతడు వాటిని బాహాటంగా తన స్వలాభానికై ప్రదర్శించకూడదు. ఏవో కొన్ని నిజమైన అవసారల కొరకై సంఘప్రయోజనాలకై కొండకొచో అన్న విధంగా వాడుకోవచ్చు. ఈ రోజుల్లో అటువంటి నిస్స్వార్ధసాధకులు చాలా తక్కువగా ఉన్నారు.

అటువంటి నిస్స్వార్ధసాధకులలో మీరూ ఒకరు గురువుగారు అని అతను తన మనసులో అనుకొని...

పూర్ణః గురువుగారు, అటువంటి సిద్ధి ఏసాధకుడికైనా ఏవిధంగా కలుగుతుంది?

 

శ్రీవిద్యా ప్రస్థానం-25

శ్రీవిద్యా ప్రస్థానం

(సాధనా సిద్ధికి ఓ సామాన్యుడి ఆధ్యాత్మికాప్రయాణం)

- శ్రీభువనానంధనాథులు

25

గురువుగారుః ఒక దేవతను ప్రతిమ లేకుండా పూజించడమే సమయము. సూక్ష్మంగా అదే అంతర్యాగం. మన ఎదురుగా ఎవరైనా దేవతయొక్క ప్రతిమను పెట్టుకొని చేసే పూజ బహిర్యాగం. దక్షిణ, కౌళాచారుల పూజ బహిర్యాగం. ఎమైతే నియమాలు బహిర్యాగంలో పాటించవలసి ఉంటుందో ఆ నియమ నిబంధనలు ఏమీ అంతర్యాగంలో వర్తించవు. ఇక్కడ గమనించవలసిన ముఖ్యవిషయం ఏమిటంటే బహిర్యాగంలో బాగా సాధన చేసిన తర్వాత మాత్రమే అంతర్యాగంలో సాధన సుళువవుతుంది. కనుక, అంతర్యాగ స్థితికి చేరుకోవడానికి బహిర్యాగం తప్పనిసరి. ఈ చిన్న విషయాన్ని అర్ధంచేసుకోలేక ఈ రోజుల్లో చాలామంది బహిర్యాగం అసలు అవసరమేలేదని ఊరికే కళ్ళు మూసుకొని కూర్చుంటే అదే గొప్ప సాధన అని ప్రచారంచేస్తున్నారు. అది సరియైన దారి కాదు. బహిర్యాగ, అంతర్యాగముల కలయికే సాధన. కొంతమంది అడగవచ్చు శ్రీరమణమహర్షులవారు ఏ బహిర్యాగం చేసారని. ఆయన ఒక సిద్ధ పురుషుడు. ఆయన ఎన్ని జన్మల పుణ్యఫలమోకదా ఈ జన్మలో కేవలం అంతర్యాగ సాధకుడయ్యారు. అసలు విషయాన్ని విస్మరించి ఆయనను ఒక ఉదాహరణగా చూపించుకొని సాధకులు తమకు తామే గోతిలో పడుతున్నారు. 

కౌళమతంలో సాధకునికి శ్రీమాత స్ఠూలశరీర రూపంలో దర్శనభాగ్యం లభిస్తుంది. ఆమె ఆ సాధకునితో మాట్లాడడం, శాస్త్రసంబంధిత విషయములలో అనుమానాలు తీర్చడం మొదలైన అనుభవాలు కలుగుతుంటాయి. అయితే దక్షిణ లేదా సమయములలో ఈ అవకాశం సాధకునకు ఉండదు. మరటువంటప్పుడు కౌళమే ఉత్తమము కదా అని నీకు అనుమానం రావచ్చు. ఇక్కడే అసలైన కీలక విషయం ఉంది. దక్షిణ/సమయాలలో సాధకుడు సాక్షాత్తు దేవీ రూపుడవుతాడు. సాధకుడే శ్రీమాత అవుతున్నపుడు అతనికి వేరేగా దేవత ఎలా కనిపిస్తుంది? నువ్వు నీ కంటిని నీకళ్ళతో  చూడగలవా? సమయానుభూతి అద్వైతస్థితి కౌళం ద్వైతస్థితి. ఈ రెండింటి మధ్య ఇదీ అసలైన మరియు ముఖ్యమైన వ్యత్యాసము.

గురువుగారి వివరణ విన్న తర్వాత చంచల్కు కొంచెంసేపు మాటరాలేదు. అతనికి ఏమి మాట్లాడాలో కూడా అర్ధం కాలేదు. కొంచెంసేపు తేరుకున్న తర్వాత అతడు గురువుగారితో ఈ విధంగా 

అన్నాడు… 

చంచల్ః మీరు చెప్పింది చాలా ఆశ్చర్యంగా మరియు అద్భుతంగా ఉంది. కానీ, నాకు అర్ధం కాని విషయం ఏమిటంటే చాలా మంది కౌళంనకు ఎందుకు ఎక్కువగా ఆకర్షితులవుతున్నారు?

గురువుగారుః అదే మాయంటే. నేను ఇంతకు ముందే చెప్పినట్టు కౌళం చాలా గొప్ప ఆచారం. ఈ సాధకునికి చాలా గొప్ప నిశ్చలమైన మనస్సు, బుద్ధి కావాలి. ఊగిసలాడే ధోరణి ఉన్నసాధకుడు ఈ ఆచారపూజా పద్ధతులకు ఆకర్షితుడయి భ్రష్టుపట్టిపోవడానికి (ఆధ్యాత్మికంగా, సాంఘికంగా) చాలా అవకాశం ఉంటుంది. కౌళమందున్న నియమ, నిబంధనలను క్షుణ్ణంగా తెలుసుకొని, నేర్చుకొని సాధనచేయాలి. 

చంచల్ః నేను ఆ పద్ధతులు తెలుసుకోవచ్చునా గురువుగారు.

గురువుగారుః తప్పకుండా. మనం దక్షిణాచారాపరులం. కానీ శ్రీవిద్యోపాసకుడుగా నువ్వు మిగతా ఆచారాలని పాటించకపోయినా తప్పక వాటి సిద్ధాంతాలను తెలుసుకోవాలి. ఒకరకంగా అది సాధనకు ఉపయోగపడుతుంది. కనుక నీకు కొన్ని ముఖ్యమైనవి మాత్రం చెబుతాను.

గురువుగారు చంచల్కు కౌళ, వామాచారములకు సంబంధించిన కొన్ని ప్రధానమైన సిద్ధాంతాలను విశదీకరించారు. అవి వింటున్నంత సేపు చంచల్ మెదడు పనిచేయడం మానివేసింది. ఆస్థానే అతనికి ఎన్నడూ లేనంత కామవికారాలు కలుగసాగాయి. ఏదో ప్రయాసతో అతడు గురువుగారు చెప్పినవి వినగలిగాడు. గురువుగారు అంతా చెప్పిన తర్వాత ఇప్పుడు నువ్వు శ్రీచక్రం గురించి, శ్రీచక్ర నవావరణ పూజావిధానము తెలుసుకోవలసిన సమయం వచ్చింది. ఇప్పటి నుండి నువ్వు సాధన కొరకై ఎక్కువ సమయం వెచ్చించవలసి ఉంటుంది. నువ్వు నాతో కూడా ఎక్కువ సమయం గడపవలసి వస్తుంది. అందుకనుగుణంగా నీ రోజువారీ పనులను ఒక ప్రణాళికా ప్రకారం చేయడం అలవాటు చేసుకో అని చంచల్కు చెప్పారు.

చంచల్ అన్యమనస్కుడై ఇంటికి బయలుదేరాడు. గురువుగారు చెప్పిన విషయాలు విన్న తర్వాత అతని శరీరంలో కామప్రకంపనలు బాగా ఎక్కువయ్యాయి. అప్పుడతడు అనుభవిస్తున్న కామవికారం అతనెప్పుడూ కనీసం అతని నవ యవ్వనంలో కూడా అనుభవించి ఉండడు. ఆ సమయంలో ఏ స్త్రీతోనైనా అతను కలవడానికి చాలా తొందరగా ఉన్నాడు. అది తప్పని తెలిసినా అతని మనసు అతనిని నిలబడనీయటం లేదు. ఆ సమయంలో అతని ఆలోచనలు ఈ విధంగా సాగాయి “ఇంటికి చేరుకోవడానికి ఇంకా గంట సమయమైనా పడుతుంది. అప్పటివరకు నా కోరికను అదుపుచేసుకోగలనా? లేనేమో అనిపిస్తోంది. అయినా నాకు ఎందుకు ఇంత కోరిక వస్తోంది. అందునా గురువుగారి పాఠాలు విన్నతర్వాత ఇలా రావడం అసమంజసం కదా. ఇది ఎంతో తప్పుకూడా. నేనేమైనా తప్పు చేస్తున్నానా. కానీ నేనిప్పుడు అశక్తుడై ఉన్నాను. ఎంత ప్రయత్నించినా నా ఈ కోరిక ఆగడంలేదే. ఇప్పుడేమి చెయ్యాలి? దారిలో కనబడుతున్న ప్రతి స్త్రీ చాలా అందంగా కనిపిస్తోంది. నేను వారిని అలా చూడ్డం తప్పు. నేను మనస్సును నియంత్రించాలి. నాగురించి నా అందమైన భార్య ఇంట్లో వేచి చూస్తూ ఉంటుంది. ఎంత త్వరగా వీలైతే అంత త్వరగా ఇంటికి చేరుకోవాలి. లేదంటే చెడిపోయేలా ఉన్నాను”. 

అతనికి పుండు మీద కారం చల్లినట్టుగా ఆ దారిలో ఏక్సిడెంట్ వల్ల ట్రాఫిక్ జామ్ అయ్యింది. అది ఇప్పుడప్పుడే క్లియర్ అయ్యేటట్టుగా అతనికి అనిపించలేదు. ఏక్సిడెంట్ చేసిన వాళ్ళని మనసులో తిట్టుకొని అతడు వేరే దారిలో తన బండిని తిప్పాడు. ఈ కొత్త దారిలో ఇంటికి చేరుకోవడానికి ఇంకొక అరగంట ఎక్కువ పడుతుంది. అటువైపుగా వెల్తుంటే అక్కడ ఒక మధ్యవయస్కురాలు బస్ స్టాప్ లో నిలబడి అతడికి కనిపించింది. ఆమెను తన కారులోకి లిప్ట్ ఇస్తానని పిలుద్దామనుకొని భయపడి ఆ ఆలోచనని విరమించుకున్నాడు. అతను మళ్ళీ ఇలా ఆలోచించసాగాడు…

“ఛ…నాకు సెక్స్ అంటే ఇంత బలహీనత ఉందా? పరస్త్రీలమీద ఇంత వ్యామోహం ఉందా? ఈ విధంగా నేను ఆలోచించడం ఎంతవరకు సరియైనది? ఇందువలన నాకు శిక్ష తప్పదేమో? పరస్త్రీ గమనం తప్పుకదా. అది నాకు తెలిసినా ఈ క్షణంలో నన్ను నేను నియంత్రించుకోలేకపోతున్నానే. నాకెందుకిలా జరుగుతోంది. ఇది నాకు పరీక్షా? లేక నా చంచల స్వభావమా? ఇంతకు మునుపు నాకెప్పుడూ ఇటువంటి స్థితి అనుభవమవ్వలేదు. ఇప్పుడేం చెయ్యాలి? సాధ్యమైనంత త్వరగా ఇంటికి చేరుకోవడం ఉత్తమం”.  ఇలాంటి ఆలోచనల్లో అతడు ఎలాగైతేనేం ఇంటికి చేరుకున్నాడు.

అతడు ఇంట్లోకి వెళ్ళేసరికి వారి పడకగదిలో మోహ ఆడుకుంటూ ఆకర్ష ఇల్లు తుడుస్తూ కనిపించారు. అతడు తన లాప్ టాప్ ను తెరచి మోహకిచ్చి ఆడుకోమన్నాడు. 

మోహః నాన్న, నువ్వు ఎప్పుడూ నాకు లాప్ టాప్ ఇవ్వవు కదా. ఇవ్వాళ ఎందుకిచ్చావ్?

చంచల్ః నువ్వు నన్ను చాలా సార్లు అడిగావు కాని నేనివ్వలేదు. కాని, నువ్విప్పుడు బాగా చదువుకుంటున్నావు కదా. అందుకే ఈ ఒక్కసారి నీకు ఇద్దామనుకున్నాను. ఇది తీసుకొని మన హాల్లో ఆడుకో. నేనివ్వమన్నప్పుడు నాకు తిరిగి ఇచ్చేయాలి. సరేనా…

మోహాః హాల్లోనే ఎందుకు? ఇక్కడెందుకు ఆడుకోకూడదు?

చంచల్ః ఎందుకంటే లాప్ టాప్ లో వీడియోగేమ్ హాల్లో అయితే చాలా బాగా వస్తుంది అందుకని.

మోహః ఓ…అలాగ. చాలా థేంక్స్ నాన్న. నేనిప్పుడే వెళ్ళి ఆడుకుంటాను.

ఆమెది కంప్యూటర్నుఅర్ఢం చేసుకొనే వయసు కాదు. ఎప్పటినుండో తను కోరుకొంటున్న లాప్ టాప్ తన చేతికి వచ్చింది. దానితో తను ఆడుకోవాలి. అదే తనకి తెలిసింది. ఆమె ఎంతో ఆనందంతో దానిని తీసుకొని హాల్లోకి పరిగెట్టింది

చంచల్ ఆకర్షను గట్టిగా పిలిచాడు. కొంచెంసేపటికి ఆమె తన వంటికి పట్టిన చెమటను తుడుచుకుంటూ అతని దగ్గరకు వచ్చింది. ఆమె రావడమే ఆలస్యం అతను ఆమెను బలంగా తనవైపుకు లాక్కొని మంచంమీద పడ్డాడు.

అప్పుడు సాయంత్రం ఆరుగంటలు కావస్తోంది. ఆసమయం శృంగారానికి నిషిద్ధం.